Luke 21

Laramtaba At Labannaa Rixin

(Mk 12:41-44)

1La ne Iesu gat kis to xeneng at loogu laplavang la ga reven luvuttadi nopnovos diga kepe lempilas atdi ro at loxot lili pilas, 2la ni ga ven lara labannaa rixin banbalo ga xepe legepu xonatat peni. 3La ne Iesu ga lok, “A tong tuturun i rinimi do, at lemeren ne Moroa, na labannaa rixin banbalo i lok li lempilas i silok ti lempilas atdi nom axap. 4Nedi di raba loxot lixilik mun at lapnovos silok atdi; ketla neni, na labantixin banbalo i raba axap lempilas ni ga ruuna i.”

Iesu Ga Paase Mumu Loogu Laplavang Naba Lok Kapmek

(Mt 24:1-14; Mk 13:1-13)

5Lentaba at luvuttadi loklok ka anasa ren diga paase mumu loogu laplavang, la lisisinang teren, la lemparuat avukat la leventamtaba limixin digam taba ne Moroa min. La ne Iesu ga lok, 6“Ana xav i na lempanga mi ven i, laaleng naba vot la kopmen toxonuat at nai naba nemen to at loxot teren; diba ut tereve axav i ukopok.”

7La diga sue ne Iesu xeretna, “Leeme loklox ase, lingisa nom lempanga naba vot? La loklok katling salai naba ravasu do na lempanga na vot?”

8La ne Iesu ga lok, “Mina lok tatao avukat nimi; lavanga tara na xarang nimi mumu na lempanga, mila buaang nedi luvuttadi dibat pas mi laasen tarak la diba lok, ‘Nenia Lanarong!’ La diba lok bok, ‘Laaleng at lovotpot at Leeme Silok mo ia vot auret ta.’ Ketla nemen mita mumu asu di. 9Nemen mita marat mo do mina ronga laraesep; lempanga xerepmo naba vot avot, ketla laxavaxap at na lavatbung menemen kopmen noxo vot soso.”

10La ne Iesu ga lok bok tidi, “Limixin at levennep silok diba esep eburu mi limixin at levennep silok petpes; lavaorong silok at lara lenep diba esep eburu mi lavaorong silok at lara lenep petpes. 11La langsangan levenangne naba vot at tengkot eburu mi leean kangking la levenanmeres silok, la leven angsangan lempanga loklox amarat naba vot eburu mi teveloklok katling boro vana at laxalibet.

12Avot ti na lempanga naba vot, diba ranga alis nimi la dina lox asongot nimi; diba song araba nimi ri lavapaase ro xeneng at laraugu singising la dina lok li nimi at loxokoxo; la diba lok kaka nimi uto melamgo at lavaorong silok la luvuttadi amgomgo xusu dina lok li nimi at lavapaase mila nemi mi nuunu rak. 13Ap mo loxonaleng miba epovo xusu mina vaase asu Lagale Lavavang. 14Mina lox agagas li levendoxoma atnimi avot ti lavapaase la nemen mita bulu mumu levelinga sala miba vaase pe nimi min; 15mila nenia aba raba nimi mi levelinga la laxasep at lakleklen kusu kopmen teta atdi di munepen minimi naba epovo xusu na vorang levelinga atnimi. 16Luvuttemen nimi, la luvutneton nimi, la lempat atnimi la larapen tangas atnimi diba song araba nimi uto atdi nom limixin di munepen minimi la diba sev amet lentaba atnimi. 17Limixin axap diba belemamao nimi mila nemi mi nuunu rak. 18Ketla ne Moroa ba lok tatao avukat nimi. 19Do mina tu lolos, miba rooro.”

Iesu Ga Paase Mumu Luutut Tereve At Lemenemen Jerusalem

(Mt 24:15-21; Mk 13:14-19)

20La ne Iesu ga lok bok, “Mo do mina ven limixin esep dina ru xangkan lemenemen silok Jerusalem, minaklen ta i dola ma lixilik la dina ut tereve i. 21La nedi no di nemen to Judaia diba sixiro uto at lempatkaana; la nedi no di nemen to at lemenemen silok, diba vas kaxat basinge i; la nedi no di nemen to maxamang at lemenemen silok, nemen di guta beles uto xeneng teren. 22Mila ap mo levenaleng Moroa naba vorang laxakapmek at limixin me Israel la kerepmo ni naba lox asorun levelinga, Lovoang Kaala ga vaase i. 23Ap mo levenaleng naba lok kapmek aleng ti lavakin di renan, la ti lavakin mi lengkadede atdi! Langsangan losongsongot naba vot at na lenep silok Israel, la lumukmusak silok at ne Moroa naba vot saparap na limixin. 24Luvuttadi esep diba sev amet tentaba mi lemparise sepsep, la diba lam kaka tentaba ngan luvuttadi xokoxo uto at lengkot petpes; la limixin kopmen di me Judaia diba lok kapmek na lemenemen Jerusalem se ap mo levenaleng ne Moroa naba riki asu di.”

Lovotpot At Laradi Mevana

(Mt 24:29-31; Mk 13:24-27)

25La ne Iesu ga lok bok tidi, “Leveloklok katling naba vot at laxangking, mi lagaaling la larapenti. La at na lavatbung menemen, limixin at lentaba levengkot diba lok bukbulu aleng la dibak lok tangtangku la diba marat mila laras na lulung aleng mi lempopaxanao. 26Limixin diba doxoma makmarat ngangais mo lempanga naba vot at na lavatbung menemen; mila lempanga ro vana at laxalibet diba sixit ekarakat la kopmen di noxo sixit mu larangas atdi. 27Ap mo levenaleng limixin diba ven ia, Laradi Mevana, anaba vot at loxontakabu mi langsangan lololos mi lisisixam. 28Dola na lempanga na ru ka i xusu na vot, miba xatu kaxat upana la mina milik aurut, mila laaleng loklox arooro atnimi mo i auret ta.”

Lavapaase Poovo Ri Luuna Pik

(Mt 24:32-35; Mk 13:28-31)

29La ne Iesu ga tong lara lavapaase poovo ridi xeretna, “Mina doxoma luuna pik la lentaba larauna vetpes bok. 30Dola mi ven lempavaxan una atdi i lok do na su xat, miklen i do levenaleng at lamaares mo nga i auret ta. 31Mo do mina ven mo lempanga xapmek na vot, mibaklen i do Linintoo at ne Moroa i auret na vot.

32Na levelinga rak i ruturun. Na limixin di rooro lingina di noxo met se na lempanga na ravasu. 33Laxalibet mi lavatbung menemen naba sonao, ketla levelinga rak noxo xap.”

Mina Lok Tatao Avukat Nimi

34La ne Iesu ga lok keretna, “Mina lok tatao avukat nimi! Nemen mita esum solo mi loklok lara peluxa la liinin lara kadan lolos, la nemen mita bulu mu na lorooro; lavanga nom laaleng na vot asangu nimi. 35Mila mo laaleng naba vot at loxonaleng limixin di noxo gagas teren. 36Mina reven avukat ti na lempanga xapmek la mina ngising amisik kusu miba ruuna lololos la mi noxo subu ap mo levenmumuat naba vot, la kusu miba epovo do mina ru ro melamgo rak, Laradi Mevana.”

37La ne Iesu ga nemen at lentaba levenaleng ga anasa ro xeneng at loogu laplavang; at levenaleng kantinao neni gat pas su mego la gat pas uto at Lakaana Olip, la at lengkanimin neni ga nemen go. 38La limixin axap digat pas su no mene at lenmaxantamak uto at loogu laplavang kusu dinang tonga i.